Şirvanşahlar sarayı ansamblı XV əsr Azərbaycan me`marlığının incisidir.
Saray kompleksinə daxil olan abidələr Bakı Kremlinin – “İçəri şəhərin” ən yüksək təpəsində yerləşir. Bir-birindən fərqli olan üç həyət – terrasda yerləşən ansambl yüksəkdən baxdıqda gözəl rəsm əsərini xatırladır.
Gözəl me`marlıq forması, daşların yonulması və hörülməsindəki valehedici dəqiqlik, portalın məharətlə oyulmuş xalçavarı ornament bəzəyi və gümbəzlərlə tamamlanan abidə bu günədək öz formasını itirməmişdir. Abidə bütövlüklə daşdan ibarətdir.
Ansambla daxildir: saray binası, divanxana, Seyid Yəhya-Bakuvinin türbəsi, saray türbəsi, minarəli saray məscidi, hamam və bir qədər sonra tikilən Şərq darvazası portalı.
Kompleksin başlıca tikilisi sayar binasıdır. Saray binası öz lakonik forması, daşların düzülüşündəki işıq oynaqlığı, portalının möhtəşəmliyi, birinci və ikinci mərtəbənin pəncərə və mazğallarındakı şəbəkə ilə nəzər-diqqəti cəlb edir.
Divanxana xüsusi qəbul və dövlət məsələləri məşvərəti yeridir. Onun ratondası tağlı eyvanlarla əhatə olunmuş çoxbucaqlı gümbəzlə örtülmüş, məharətlə oyulmuş nəbati ornament bəzəyi və yazılardan ibarət olan portalla qurtarır.
Portalında adı yazılan, müəllifi me`mar Məhəmməd Əli olan, Şirvanşahlar türbəsi öz gözəlliyi və zəngin ornament bəzəyi ilə XV əsr divanxanasının portalından heç də geri qalmır.
Türbə ilə yanaşı, minarəsində abidənin 1441-ci ildə tikildiyini göstərən yazı olan, saray məscidi yerləşir.
Ansamblın cənub həyətində saray alimi Seyid Yəhya-Bakuvinin çox da böyük olmayan gümbəzlə örtülmüş səkkizbucaqlı türbəsi ucalır.
Aşağı həyətdə, yerin altında, maraqlı abidə olan XV əsr saray hamamı yerləşir. Hamam bizə uçub-dağılmış formada gəlib çatsa da, qalıqlar binanın rasional kompozisiyaya uyğun olaraq tikildiyini qeyd edir.
Me`mar Əmirşahın yaratdığı Şərq darvazası portalı (1585–ci il) ansamblın XVI əsrə aid olan yeganə tikilisidir.
Bütün bunlara siz “Şirvanşahlar sarayı” dövlət tarixi – me`marlıq qoruq – muzeyinə gəlməklə nəzər yetirə bilərsiniz.

Ynvanımız 370004, İçəri Şəhər, Böyük Qala küçəsi, 46
tel: 492-83-04, 492-10-73

“Şirvanşahlar sarayı kompleksi”nin me`marlıq abidələri.

Аджалов Р.М., Адигезалов Э.А. Фото Кулиева В.

Şirvanşahlar Sarayı kompleksinin fotoqalereyası